22.6 C
Hubli
ಜುಲೈ 4, 2022
eNews Land
ಆರೋಗ್ಯ

ಗೋಡಂಬಿ ರುಚಿ ಮತ್ತು ಉತ್ತಮ ಪೌಷ್ಟಿಕ ಆಹಾರವೂ ಹೌದು…!

Listen to this article

 

ಇಎನ್ಎಲ್ ಬ್ಯೂರೋ

ಗೋಡಂಬಿ ರುಚಿ ಮತ್ತು ಉತ್ತಮ ಪೌಷ್ಟಿಕ ಆಹಾರವೂ ಹೌದು…!

ಗೋಡಂಬಿ ಎಂದರೆ ಸಿಹಿ ಖಾದ್ಯಗಳ ರುಚಿ ಮತ್ತು ಸೊಬಗನ್ನು ಹೆಚ್ಚಿಸುವ ಒಣಫಲ ಎಂದೇ ನಾವು ತಿಳಿದಿದ್ದೇವೆ. ಅಲ್ಲದೇ ಇದು ಕೊಂಚ ದುಬಾರಿಯೂ ಆಗಿರುವ ಕಾರಣ ಸೇವನೆಯಲ್ಲಿ ಕೊಂಚ ಬಿಗಿತವನ್ನೂ ಮಾಡುತ್ತೇವೆ. ಆದರೆ ಇದೊಂದು ಅದ್ಭುತ ಪೌಷ್ಟಿಕ ಆಹಾರವೆಂದು ನಮ್ಮಲ್ಲಿ ಹೆಚ್ಚಿನವರಿಗೆ ತಿಳಿದಿಲ್ಲ. ಗೋಡಂಬಿ ರುಚಿಕರ ಒಣಫಲವಾಗಿದೆ. ಭಾರತದಲ್ಲಿ, ಅದರಲ್ಲೂ ಕರ್ನಾಟಕ, ಕೇರಳ ಮಹಾರಾಷ್ಟ್ರದಲ್ಲಿ ಅತಿ ಹೆಚ್ಚಾಗಿ ಬೆಳೆಯಲಾಗುತ್ತಿರುವ ಗೇರು ಭಾರತದ ಬೆಳೆಯಂತೂ ಅಲ್ಲ. ಬ್ರೇಜಿಲ್ ದೇಶದಿಂದ ತಂದು ಬೆಳೆಸಿದ ಬೆಳೆ ಈಗ ನಮ್ಮ ನೆಲದಲ್ಲಿ ಸ್ವಂತದ್ದೇ ಅನ್ನುವಷ್ಟು ಚೆನ್ನಾಗಿ ಬೆಳೆಯುತ್ತದೆ. ಗೋಡಂಬಿ ಗೇರುಹಣ್ಣಿನ (ವಾಸ್ತವದಲ್ಲಿ ಇದು ರಸ ತುಂಬಿದ ತೊಟ್ಟು) ಬುಡದಲ್ಲಿರುವ ಬೀಜದ ಒಳಗಿರುವ ತಿರುಳಾಗಿದೆ ಹಾಗೂ ಇದರಲ್ಲಿ ತಾಮ್ರ, ಸತು, ಮೆಗ್ನೀಶಿಯಂ, ಕಬ್ಬಿಣ ಹಾಗೂ ರಂಜಕದಂತಹ ಪ್ರಮುಖ ಖನಿಜಗಳಿವೆ. ಅಲ್ಲದೇ ಇದು ಅತ್ಯುತ್ತಮ ಸಸ್ಯಜನ್ಯ ಪ್ರೋಟೀನ್ ಮೂಲವೂ ಆಗಿದೆ.
ಕರಗದ ನಾರು ಹಾಗೂ ಆರೋಗ್ಯಕರ ಕೊಬ್ಬುಗಳೂ ಉತ್ತಮ ಪ್ರಮಾಣದಲ್ಲಿವೆ. ಗೋಡಂಬಿ ಹುರಿದ, ಖಾರದ, ಖಾರವಿಲ್ಲದ, ಸಿಹಿಲೇಪಿತ ಮೊದಲಾದ ಹಲವಾರು ವಿಧಗಳಲ್ಲಿ ಪ್ಯಾಕೆಟ್ಟುಗಳಲ್ಲಿ ಎಲ್ಲೆಡೆ ಲಭ್ಯವಿರುವ ಕಾರಣ ಪ್ರಯಾಣದ ಸಮಯದಲ್ಲಿ ಸೇವಿಸಲು ಅದ್ಭುತವಾದ ಆಹಾರವೂ ಆಗಿದೆ. ಗೋಡಂಬಿಯ ಡೈರಿ ಮೂಲವಲ್ಲದ ಹಾಲು, ಕ್ರೀಮ್, ಬೆಣ್ಣೆಯ ಪರ್ಯಾಯವನ್ನೂ ಇಂದು ತಯಾರಿಸಲಾಗುತ್ತಿದೆ. ಆದರೆ, ಈ ಉತ್ಪನ್ನಗಳು ಅತಿ ದುಬಾರಿಯಾಗಿರುವ ಕಾರಣ ಇನ್ನೂ ಜನಪ್ರಿಯತೆ ಪಡೆದಿಲ್ಲ.
ಗೋಡಂಬಿ ಕೇವಲ ಕುರುಕು ತಿಂಡಿ ಮಾತ್ರವಲ್ಲದೇ ಹಲವಾರು ವಿಧದಲ್ಲಿ ಆರೋಗ್ಯಕ್ಕೆ ಪೂರಕವಾಗಿದೆ. ಅಧಿಕ ರಕ್ತದ ಒತ್ತಡವನ್ನು ನಿಯಂತ್ರಿಸುವುದು, ಹೃದಯದ ಬಡಿತವನ್ನು ನಿಯಂತ್ರಿಸುವುದು, ತೂಕ ಇಳಿಕೆಯ ಪ್ರಯತ್ನಗಳಿಗೆ ನೆರವಾಗುವುದು ಇತ್ಯಾದಿ. ಇಂದಿನ ಲೇಖನದಲ್ಲಿ ಗೋಡಂಬಿಯ ನಿಯಮಿತ ಸೇವನೆಯಿಂದ ಲಭಿಸುವ ಪ್ರಯೋಜನಗಳ ಬಗ್ಗೆ ಅರಿಯೋಣ ತೂಕ ಇಳಿಕೆಯಲ್ಲಿ ನೆರವಾಗುವುದು ನಿಯಮಿತವಾಗಿ ಒಣಫಲಗಳನ್ನು ಸೇವಿಸುತ್ತಾ ಬಂದಿರುವ ವ್ಯಕ್ತಿಗಳ ತೂಕ ಇಳಿಕೆಯ ಪ್ರಯತ್ನಗಳು ಇತರ ವ್ಯಕ್ತಿಗಳಿಗಿಂತಲೂ ಹೆಚ್ಚು ಸಫಲವಾಗಿವೆ. ಒಣಫಲಗಳಲ್ಲಿ ಸಸ್ಯಜನ್ಯ ಪ್ರೋಟೀನ್, ಕರಗುವ ಮತ್ತು ಕರಗದ ನಾರಿನಂಶ ಹಾಗೂ ಆರೋಗ್ಯಕರ ಕೊಬ್ಬುಗಳಿವೆ.

ಇವು ಹಸಿವನ್ನು ನೀಗಿಸಿ ಅನಗತ್ಯ ಅಹಾರ ಸೇವನೆಯಿಂದ ತಡೆಯುವುದೇ ತೂಕ ಇಳಿಕೆ ಸಫಲವಾಗಿರುವ ಗುಟ್ಟು. ಒಣಫಲಗಳಲ್ಲಿ ಬಾದಾಮಿ, ಅಕ್ರೋಟು ಹಾಗೂ ಪಿಸ್ತಾ ಎಲ್ಲವೂ ಆರೋಗ್ಯಕರವೇ ಆದರೂ ಇವು ಕೊಂಚ ದುಬಾರಿಯಾಗಿರುತ್ತವೆ. ಬಡವರ ಬಾದಾಮಿ ಶೇಂಗಾಬೀಜ ಅಗ್ಗವೂ ಆರೋಗ್ಯಕರವಂತೂ ಹೌದು, ಆದರೆ, ಇದರಲ್ಲಿ ಕ್ಯಾಲೋರಿಗಳು, ಎಣ್ಣೆ ಹಾಗೂ ಕೊಬ್ಬಿನಂಶ ಕೊಂಚ ಹೆಚ್ಚಿರುತ್ತದೆ. ಹಾಗಾಗಿ, ಎಲ್ಲಾ ಅಂಶಗಳನ್ನು ಪರಿಗಣಿಸಿದರೆ ಗೋಡಂಬಿ ತೂಕ ಇಳಿಕೆಯ ನಿಟ್ಟಿನಲ್ಲಿ ಆತಿ ಸೂಕ್ತ ಹಾಗೂ ಕೈಗೆಟಗುವ ಬೆಲೆಯುಳ್ಳ ಒಣಫಲ ಎಂದು ಹೇಳಬಹುದು.
​ಕೊಲೆಸ್ಟ್ರಾಲ್ ಮಟ್ಟಗಳನ್ನು ಆರೋಗ್ಯಕರ ಮಟ್ಟದಲ್ಲಿರಿಸಲು ನೆರವಾಗುತ್ತದೆ. ನಮ್ಮ ರಕ್ತದಲ್ಲಿ ಎರಡು ಬಗೆಯ ಕೊಲೆಸ್ಟ್ರಾಲ್ ಗಳಿವೆ. ಎಲ್ ಡಿ ಎಲ್ ಅಥವಾ ಲೋ ಡಿನ್ಸಿಟಿ ಲಿಪೋಪ್ರೋಟೀನ್ಸ್ – ಇವು ಅತಿ ಚಿಕ್ಕ ಕಣಗಳಾಗಿದ್ದು ಗಟ್ಟಿಯಾಗಿ ಅಂಟಿಕೊಂಡು ಇನ್ನಷ್ಟು ಕಣಗಳನ್ನು ಅಂಟಿಸಿಕೊಳ್ಳುತ್ತಾ ರಕ್ತಪ್ರವಾಹಕ್ಕೆ ಅಡ್ಡಿ ಉಂಟು ಮಾಡುತ್ತವೆ. ಇವನ್ನು ಕೆಟ್ಟ ಕೊಲೆಸ್ಟ್ರಾಲ್ ಎಂದು ಭಾವಿಸಲಾಗುತ್ತದೆ. ಇನ್ನೊಂದು ಹೆಚ್ ಡಿ ಎಲ್ ಅಥವಾ ಹೈ ಡೆನ್ಸಿಟಿ ಲಿಪೋಪ್ರೋಟೀನ್ಸ್. ಹೆಸರೇ ತಿಳಿಸುವಂತೆ, ಇವು ಅಧಿಕ ಸಾಂದ್ರತೆಯ ಕಣಗಳಾಗಿದ್ದು ರಕ್ತ ಪ್ರವಾಹಕ್ಕೆ ಜಾರುಕವಾಗಿ ಕಾರ್ಯನಿರ್ವಹಿಸುತ್ತವೆ.
ನಮಗೆ ಇವೆರಡೂ ಒಂದು ಆರೋಗ್ಯಕರ ಅನುಪಾತದಲ್ಲಿ ಬೇಕು. ಆದರೆ, ಯಾವಾಗ ಇವುಗಳ ಮಟ್ಟ ಏರುತ್ತದೆಯೋ ಆಗ ಹೃದಯ ಸಂಬಂಧಿ ತೊಂದರೆಗಳೂ ಆವರಿಸುತ್ತವೆ. ಗೋಡಂಬಿ ಎಲ್ ಡಿ ಎಲ್ ಅನ್ನು ಕಡಿಮೆಗೊಳಿಸುವ ಗುಣ ಮತ್ತು ಹೆಚ್ ಡಿ ಎಲ್ ಅನ್ನು ಹೆಚ್ಚಿಸುವ ಹೊಂದಿದೆ. ತನ್ಮೂಲಕ ಈಗಾಗಲೇ ಇತರ ಕಾರಣಗಳಿಂದ ಏರುಪೇರಾಗಿದ್ದ ಈ ಮಟ್ಟಗಳು ಆರೋಗ್ಯಕರ ಮಟ್ಟಕ್ಕೆ ಹಿಂದಿರುಗಲು ಗೋಡಂಬಿಯ ನಿಯಮಿತ ಸೇವನೆ ನೆರವಾಗುತ್ತದೆ.
​ಹೃದಯದ ಆರೋಗ್ಯಕ್ಕೂ ಒಳ್ಳೆಯದು, ಬ್ರಿಟನ್ನಿನ ಪೋಷಕಾಂಶ ಮಾಧ್ಯಮವಾದ ನ್ಯೂಟ್ರಿಶನ್ ಎಂಬ ಪತ್ರಿಕೆ 2007 ರಷ್ಟು ಹಿಂದೆಯೇ ಗೋಡಂಬಿ ಮತ್ತು ಹೃದಯದ ಆರೋಗ್ಯದ ಬಗ್ಗೆ ಇರುವ ಸಂಬಂಧವನ್ನು ಪ್ರಕಟಿಸಿದೆ. ಈ ವರದಿಯ ಪ್ರಕಾರ ಗೋಡಂಬಿಯನ್ನು ಕನಿಷ್ಟ ವಾರಕ್ಕೆ ನಾಲ್ಕು ಬಾರಿಯಾದರೂ ಸೇವಿಸುತ್ತಾ ಬಂದಿರುವ ವ್ಯಕ್ತಿಗಳಿಗೆ ಹೃದಯ ಸಂಬಂಧಿ ಕಾಯಿಲೆಗಳು ಆವರಿಸುವ ಸಾಧ್ಯತೆ ಉಳಿದವರಿಗಿಂತ 37% ಕಡಿಮೆ ಇರುತ್ತದೆ. ಗೋಡಂಬಿ ಏಕ ಅಸಂತೃಪ್ತ (ಮೋನೋ ಅನ್ ಸಾಚುರೇಟೆಡ್) ಮತ್ತು ಬಹು ಅಸಂತೃಪ್ತ (ಪಾಲಿ ಅನ್ ಸಾಚುರೇಟೆಡ್) ಕೊಬ್ಬಿನ ಆಮ್ಲಗಳಿಂದ ಸಮೃದ್ಧವಾಗಿರುವ ಕಾರಣ ರಕ್ತ ಪ್ರವಾಹವನ್ನು ಸುಗಮಗೊಳಿಸಲು ನೆರವಾಗುತ್ತದೆ, ತನ್ಮೂಲಕ ಹೃದಯದ ಆರೋಗ್ಯವನ್ನು ವೃದ್ದಿಸುತ್ತದೆ.
​           ಜೀವಕೋಶಗಳಿಗೆ ಎದುರಾಗುವ ಹಾನಿಯಿಂದ ರಕ್ಷಿಸುತ್ತದೆ. ಒಣಫಲಗಳನ್ನು ಯಾಂಟಿಟಿಆಕ್ಸಿಡೆಂಟುಗಳ ಉತ್ತಮ ಮೂಲವೆಂದು ಪರಿಗಣಿಸಲಾಗಿದೆ. ಇವು ಜೀವಕೋಶಗಳಿಗೆ ಹಾನಿ ಎಸಗುವ ಕಣಗಳಿಂದ ರಕ್ಷಣೆ ಒದಗಿಸುವ ಮೂಲಕ ರಕ್ಷಣೆ ನೀಡುತ್ತವೆ. ತನ್ಮೂಲಕ ಹಲವಾರು ಕಾಯಿಲೆಗಳಿಂದ ಹಾಗೂ ವಿಶೇಷವಾಗಿ ಉರಿಯೂತದಿಂದ ರಕ್ಷಿಸುತ್ತದೆ. ಹಸಿ ಗೋಡಂಬಿಗಿಂತಲೂ ಹುರಿದ ಗೋಡಂಬಿಗಳೇ ಹೆಚ್ಚು ಆಂಟಿ ಆಕ್ಸಿಡೆಂಟುಗಳಿಂದ ಸಮೃದ್ಧವಾಗಿವೆ. ​ರಕ್ತದಲ್ಲಿ ಸಕ್ಕರೆಯ ಮಟ್ಟವನ್ನು ನಿಯಂತ್ರಿಸುತ್ತದೆ. ಗೋಡಂಬಿಯಲ್ಲಿ ಸಕ್ಕರೆಯ ಪ್ರಮಾಣ ಅತಿ ಕಡಿಮೆ ಇರುವ ಜೊತೆಗೇ ರಕ್ತದಲ್ಲಿರುವ ಸಕ್ಕರೆಯ ಮಟ್ಟಗಳನ್ನು ನಿಯಂತ್ರಿಸುವತ್ತ ಧನಾತ್ಮಕ ಪ್ರಭಾವವನ್ನೂ ಬೀರುತ್ತದೆ. ಗೋಡಂಬಿಯನ್ನು ಆಹಾರದ ಜೊತೆಗೆ ಸೇವಿಸಿದಾಗ ಇತರ ಆಹಾರಗಳಲ್ಲಿರುವ ಸಕ್ಕರೆಯೂ ಅತಿ ನಿಧಾನವಾಗಿ ರಕ್ತಕ್ಕೆ ಬಿಡುಗಡೆಯಾಗಲು ಸಾಧ್ಯವಾಗುತ್ತದೆ. ತನ್ಮೂಲಕ ರಕ್ತದಲ್ಲಿ ಸಕ್ಕರೆಯ ಮಟ್ಟ ಧಿಡೀರನೇ ಏರುವುದನ್ನು (ಶುಗರ್ ಸ್ಪೈಕ್) ತಡೆಯುತ್ತದೆ. ಈ ಗುಣ ಮಧುಮೇಹಿಗಳಿಗೆ ಒಂದು ವರದಾನವೂ ಆಗಿದೆ.

​ಎಚ್ಚರಿಕೆ : ಹಸಿ ಗೋಡಂಬಿ ಅಪಾಯಕಾರಿ ಇಂದಿಗೂ ಹಳ್ಳಿಗಳಲ್ಲಿ, ಗೇರುಬೀಜವನ್ನು ಸುಲಿದು ಒಳಗಿನ ತಿರುಳನ್ನು ಸಿಪ್ಪೆಯ ಸಹಿತ ಹಸಿಯಾಗಿಯೇ ಮಾರುತ್ತಾರೆ. ಏಕೆಂದರೆ ಗೇರುಬೀಜವನ್ನು ಹುರಿದು ಮೇಲಿನ ಸಿಪ್ಪೆ ನಿವಾರಿಸಿ ವಾಣಿಜ್ಯ ಮಟ್ಟದಲ್ಲಿ ಮಾರಲು ಅಲ್ಪ ಪ್ರಮಾಣದ ಸಂಗ್ರಹದಿಂದ ಸಾಧ್ಯವಿಲ್ಲ ಮತ್ತು ಉದ್ಯಮದಲ್ಲಿ ಬರುವಷ್ಟು ಗುಣಮಟ್ಟವೂ ಬರುವುದಿಲ್ಲ. ಆದರೆ, ಎಂದಿಗೂ ಹೀಗೆ ಲಭಿಸುವ ಹಸಿ ಗೋಡಂಬಿಗಳನ್ನು ಸೇವಿಸದಿರಿ. ಇವುಗಳಲ್ಲಿ ಕೆಲವು ವಿಷಕಾರಿ ದ್ರವಗಳಿವೆ.

ಇದರಲ್ಲಿ ಪ್ರಮುಖವಾದುದು ಉರುಶಿಯಾಲ್ ಎಂಬ ರಾಸಾಯನಿಕ. (ಗೇರು ಎಣ್ಣೆಯ, ತೊಟ್ಟು ಮುರಿದಾಗ ಒಸರುವ ಹಾಲು ಇವೆಲ್ಲದರ ಪ್ರಮುಖ ಅಂಶವೂ ಇದೇ) ಇದು ಚರ್ಮವನ್ನು ಸುಡುವ ಗುಣ ಇದು ಹೊಟ್ಟೆಗೆ ಹೋದರಂತೂ ಹೊಟ್ಟೆನೋವು ಹಾಗೂ ಜೀರ್ಣಕ್ರಿಯೆಯಮ್ಮೇ ಬಾಧಿಸುವಷ್ಟು ಪ್ರಭಾವ ಬೀರುತ್ತವೆ ಹಾಗೂ ದೀರ್ಘಕಾಲೀನ ಅಪಾಯಗಳೂ ಎದುರಾಗಬಹುದು. ಕೆಲವೆಡೆ ಇವನ್ನು ಹಬೆಯಲ್ಲಿ ಬೇಯಿಸಿ ಹಸಿ ಗೋಡಂಬಿ (ರಾ ಕ್ಯಾಶ್ಯೂ) ಎಂದು ಪ್ಯಾಕೆಟ್ಟುಗಳಲ್ಲಿ ಮಾರಲಾಗುತ್ತದೆ. ಇವನ್ನೂ ಹಾಗೇ ಸೇವಿಸಬಾರದು, ಏಕೆಂದರೆ ಹಬೆಗೆ ಈ ಉರುಶಿಯಾಲ್ ಪರಿಪೂರ್ಣವಾಗಿ ನಾಶವಾಗದು, ಇದು ಏನಿದ್ದರೂ ಬಿಸಿಗೇ ನಾಶವಾಗುತ್ತದೆ. ಆದ್ದರಿಂದ ಕೇವಲ ಹುರಿದ ಗೋಡಂಬಿಗಳನ್ನು ಮಾತ್ರವೇ ಸೇವಿಸಬೇಕು.

Related posts

ಗಾಂಧಾರಿ ಮೆಣಸು/ಜೀರಿಗೆ ಮೆಣಸು/ಕಾಡು ಮೆಣಸು ಮೇಲೆ ಎಲ್ಲರ ಕಣ್ಣು!!!

eNewsLand Team

ಧಾರವಾಡ: ಎಸ್ಡಿಎಂ ಕಾಲೇಜಿನ 66 ವಿದ್ಯಾರ್ಥಿಗಳಿಗೆ ಕೋವಿಡ್ ಪಾಸಿಟಿವ್!

eNewsLand Team

ಕರ್ನಾಟಕದ ಮೂಲಕ ದೇಶಕ್ಕೆ ಒಮಿಕ್ರಾನ್ ಎಂಟ್ರಿ! ಇನ್ಮೇಲಾದ್ರೂ ಹುಷಾರಾಗಿರಿ

eNewsLand Team